Eph 4 | MED | STEP | Na Nuim ei nga kongun kindmant endᵾp kᵾn, enim kᵾn ronduⱡ mundᵾp, waldᵾp ei mel nᵾnt. Enim nga mul orunga, Got ndi, enim wi ropa rukᵾr tᵾpa namba uⱡ iteing nimba, tou rurum uⱡ mbᵾ etᵾk muⱡᵾi!

Ephesians 4

Tᵾn Mondpa Pili Wamp Ei, Kraist Kᵾn Kᵾng Tenda

1 Na Nuim ei nga kongun kindmant endᵾp kᵾn, enim kᵾn ronduⱡ mundᵾp, waldᵾp ei mel nᵾnt. Enim nga mul orunga, Got ndi, enim wi ropa rukᵾr tᵾpa namba uⱡ iteing nimba, tou rurum uⱡ mbᵾ etᵾk muⱡᵾi! 2 Wamp mbᵾ nga mana orunga molk, raka nᵾk, timing tek min mondᵾk, koma pou raⱡ tek muⱡᵾi. Wamp numan ngui uⱡ ei, enim ndi, ora nduing ei, enim nga ᵾngᵾnᵾl mbᵾ tᵾk rᵾpᵾndᵾi! 3 Muⱡnga Wingti ei ndi, enim nga moⱡpa kundi orunga nimba kᵾn, enim etpa tᵾpa numan tenda mundrum uⱡ ei, ambulk gi nduk muⱡᵾi! 4 Got ndi, enim etpa numan tenda pendpa mel tenda ti, nukᵾndeing nimba, wi ropa titim ei, mel kᵾng tenda. Muⱡnga tenda ei nga mint nokᵾndᵾk muⱡᵾi! 5 Nuim tenda mint morum, mondpa pili tenda, nu ti uⱡ ei, tenda mint, Got tenda mint morum ei, wamp pora nga Tipam morum. Wamp kep, mel namba mel tenᵾm kanmᵾn mbᵾ nga Nuim oⱡa orunga moⱡpa, wote rukᵾr orunga moⱡpa, kongun etᵾm.

7 Kraist elim nga numan ila, elim nga kongun ronduⱡ minal tetᵾm mbᵾ nga, tᵾn wamp tenda tenda nimba ei, kongun itmin tou ila kandpa, mok ropa ngurum. 8 Buk Wingti ila, ei nimba mel,

“Elim oⱡa purum ei kᵾn, kan ngurung wamp puⱡi mepa purum, wote wamp mbᵾ, kongun ronduⱡ mat ngurum,” nᵾtᵾm.
9 Akup wote, “oⱡa orunga purum,” nimba ik petᵾm ei, puⱡ ei, etpa petᵾm mel nant? Ik ei nga puⱡ ei, kuimp tepa elim mana urum, mana omba mᵾi mana orunga purum. 10 Ei nga, elim wamp tenda mana urum ei ku, oⱡa purum. Oⱡa mba, muⱡ kᵾmp mbᵾ, tᵾpa mana ndupa, akup elim mana kep, oⱡa kep, kona nant mbila moⱡpa, kapⱡa endᵾmba pilpa itim. 11 Elim ndi, wamp mbᵾ kongun ronduⱡ mbᵾ, kᵾmp tᵾpa ngurum. Mat tᵾpa, nombuⱡa rung wamp mondpa, mat tᵾpa, ik painui wamp mondpa, mat tᵾpa, Rᵾnang Ik nindi wamp mondpa, mat tᵾpa, kongun peng ila mondpa, ik mbo wamp mondpa etᵾm. 12 Kraist ndi, tᵾn Got nga wamp mbᵾ, tᵾpa rapᵾndpa, kongun ronduⱡ mbᵾ ngumba, elim nga kongun kai mbᵾ tamina, elim nga kᵾng ei, mba ou tangga nimba itim. 13 Kongun mbᵾ, etᵾp mint mbun, wote ui ti kᵾn, tᵾn pora, Got kangᵾm ei kᵾn, numan ronduⱡ pᵾtmᵾn uⱡ ei kᵾn, mondpa pili uⱡ ei kᵾn, tenda ila moⱡpᵾn, Kraist elim tou tenda ila muⱡmin.

14 Wote tᵾn, nde mun na ti, kᵾpkᵾ ropa, roimp rᵾkᵾ nᵾtᵾm ni mel, kangambuⱡa kel raⱡpᵾn muⱡi nᵾmbᵾⱡmin. Ik kol nga puⱡ wamp mat ndi, ik kol ropa, mat mim etᵾk ik kupa mel mbo endᵾk, wamp mat tᵾk kona kit ila mundᵾrmin. Uⱡ mbᵾ, tᵾn kum ti nᵾtᵾmᵾn. 15 Ei mon, wamp numan ngui uⱡ mbᵾ etpᵾn, ik kupa nimbun, wamp kupa raⱡpᵾn, Kraist ei uⱡ mbᵾ nga peng ei morum. Ei kᵾn, moⱡᵾp gi ndᵾmin. 16 Elim peng ila moⱡpa, kᵾng ila kᵾmp ki, kum mel, elpa elpa petᵾm mbᵾ, tᵾpa rak ndupa ambrᵾm. Wote kᵾmp, ki kum mel, elpa elpa mbᵾ, en enim nga etpa pinditim kona, koⱡ ila rok kundᵾk, molk kᵾn, ti ndi, ti paka roⱡnga, kᵾng tenda ei, ambulk gi ndurmin. Ei nga, mel elpa elpa kᵾⱡ, kongun tou ila elpa elpa etmin ei kᵾn, wamp numan ngui uⱡ ila kᵾng nᵾnmᵾn ei, oⱡa omba, ou etpa ronduⱡ purum.

Kraist Kᵾn Nombuⱡa Kont Paka Ila Ʉndᵾi

17 Nuim ei nga mbi ila, na ik ei nᵾmp, wote ronduⱡ man ngump nᵾnt. Enim mbo wamp ralk, numan wᵾlᵾ pilik, pek mormin ei mel, pek muⱡi nᵾmbᵾⱡᵾi. 18 Wamp mbᵾ nga numan orunga rumbᵾⱡ morum, ik pilpa ti, uⱡ orunga tip morum. Ei nga, Got ndi, wamp nga numan mbo ingk ngurum uⱡ ila, ruk muⱡi nambᵾrmᵾn. Ei nambuⱡ emel, ik tᵾk roi nduⱡina, mundmong orunga ku rarᵾm. 19 Pipil kuⱡi nakᵾrmᵾn, uⱡ kit minal etᵾk, wote iting ei nga numan ngurmin.

20 Enim Kraist nga ik pilik tᵾtᵾng ei, ya uⱡ mbᵾ mel iteing nᵾk, mbo indi nandᵾtᵾng mon! 21 Na pᵾnt ei, Kraist nga ik ei, enim pilik tᵾtᵾng. Wote, ik kupa Jisas kᵾn petᵾm uⱡ mbᵾ, enim mbo endilingina pᵾtᵾng. 22 Enim nga uⱡ unt nga etᵾng mbᵾ, wak rok mundᵾi! Uⱡ mbᵾ ndi, enim ik kol, numan kit mbᵾ, mbo rundrum ei mel ku, pek morung. Uⱡ unt nga nimbᵾ, ik kol na, numan kit na mbᵾ ndi, enim etpa kit mundrum. 23 Enim numan kont paka kai ti kandᵾk tᵾi! 24 En enim etᵾk, wamp kont paka kat, Got nga numan pilpa mim itim ei mel muⱡᵾi! Uⱡ i etᵾk eng ei ndi, enim wamp kun kai wingti kᵾⱡ muⱡing.

25 Enim ik kol rormᵾn mbᵾ, wak rok mundᵾi! Enim wamp mbᵾ pora, angmᵾn nᵾk, ik kupa ei mint nᵾi! Nambuⱡ emel, tᵾn pora, Kraist nga kᵾng tenda ila mint mormun. 26 Enim popᵾⱡ ti, kandᵾk tᵾng ndam, popᵾⱡ ei ndi, enim etpa uⱡ kit ila mepa pi nᵾpangga! Wote popᵾⱡ ei, pilik muⱡangina, ant ei mana pi nᵾpangga! 27 Seitan ruk omba, ei nga paⱡa polkᵾn muⱡi! 28 Kᵾndᵾp norum wamp ni, akup kᵾndᵾp nui nᵾnangga! Elim nga ki raⱡ ndi, kongun uⱡ ronduⱡ mat etangga! I etpa kᵾn, mel kai mat, etpa oⱡa tᵾpa, kurpa pum wamp ei, mok ropa ngangga!

29 Ik pundma kit mbᵾ, ni nandᵾk, nimba ndoimp rundi ik kai mbᵾ nᵾi! Ei kᵾn, nᵾk ngun wamp ei, ronduⱡ tangga, ᵾldᵾ orunga moⱡpa pilim wamp ei, pilpa kai pilangga! 30 Muⱡnga Wingti ei, etᵾk mbun ngui ngᵾngᵾi! Got ndi, Muⱡnga Wingti ei, enim kᵾn tip timal mel etpa ngumba, wakᵾt elim nga ui ou ei, ekit om kᵾn, enim etpa kan pilinga ndupa, wei mondᵾmba ei nga ngurum. 31 Mundmong kit pili uⱡ, ik mura iti uⱡ, popᵾⱡ mundi uⱡ, kei aⱡi nᵾk ik mbuldung orunga ni uⱡ mbᵾ kᵾn, wote namba numan kit pᵾtmin uⱡ mbᵾ, wak rok mundᵾi! 32 Uⱡ mbᵾ pendᵾk kelik, numan kai pendᵾk, angmᵾn mat kᵾn ik kai nᵾk, mok kai etᵾk, wote angmᵾn mat ndi, etᵾk kit mondung ndam, nit mbᵾ wak rᵾi! Kraist nga mbi ila, enim nga nit mbᵾ, Got ndi, wak rurum ei mel ku, wak rᵾi!